ಕಾಸರಗೋಡು: ಬೈಕ್ ಗೆ ಡಿಕ್ಕಿ ಹೊಡೆದ ಟೋರಸ್ ಲಾರಿ ಚಾಲಕನ ನಿಯಂತ್ರಣ ತಪ್ಪಿ ಬಸ್ಸು ತಂಗುದಾಣಕ್ಕೆ ನುಗ್ಗಿದ ಘಟನೆ ನೀರ್ಚಾಲ್ ನಲ್ಲಿ ನಡೆದಿದ್ದು, ಬೈಕ್ ಸವಾರ ಪ್ರಾಣಾಪಾಯದಿಂದ ಪವಾಡ ಸದೃಶವಾಗಿ ಪಾರಾಗಿದ್ದಾರೆ. ನೀರ್ಚಾಲ್ ನಲ್ಲಿರುವ ಬೇಳ ಗ್ರಾಮ ಕಚೇರಿ ಸಮೀಪ ಇಂದು ಬೆಳಿಗ್ಗೆ ಈ ಘಟನೆ ನಡೆದಿದೆ.
ಬೈಕ್ ಸವಾರ ಬಿ.ಎಂ ಅಬ್ಬಾಸ್ ಪಾರಾದ ಬೈಕ್ ಸವಾರ. ಬಿರ್ಮಿನಡ್ಕದಿಂದ ನೀರ್ಚಾಲ್ ಗೆ ಬರುತ್ತಿದ್ದ ಬೈಕ್ ಹಾಗೂ ನೀರ್ಚಾಲ್ ನಿಂದ ಮಾನ್ಯ ಕಡೆಗೆ ತೆರಳುತ್ತಿದ್ದ ಲಾರಿ ಬೇಳ ಗ್ರಾಮ ಕಚೇರಿ ಸಮೀಪ ಸಂಪರ್ಕ ರಸ್ತೆ ಬಳಿ ಬೈಕ್ ಗೆ ಡಿಕ್ಕಿ ಹೊಡೆದಿದ್ದು, ಬಳಿಕ ನಿಯಂತ್ರಣ ತಪ್ಪಿ ಬಸ್ಸು ತಂಗುದಾಣದೊಳಗೆ ನುಗ್ಗಿದೆ. ಡಿಕ್ಕಿಯ ರಭಸಕ್ಕೆ ಶೆಡ್ ನೆಲ ಕಚ್ಚಿದೆ.
ಈ ಸಂದರ್ಭದಲ್ಲಿ ತಂಗುದಾಣದೊಳಗೆ ಪ್ರಯಾಣಿಕರಾರು ಇಲ್ಲದಿದ್ದುದರಿಂದ ಭಾರೀ ಅಪಾಯ ತಪ್ಪಿದೆ ಎನ್ನಬಹುದು. ಬೈಕ್ ನ್ನು ಲಾರಿ ಎಳೆದು ಕೊಂಡು ಹೋಗಿದ್ದು, ಅಬ್ಬಾಸ್ ಡಿಕ್ಕಿ ಹೊಡೆದ ಸಂದರ್ಭದಲ್ಲಿ ರಸ್ತೆಗೆ ಬಿದ್ದರೂ ಸಣ್ಣ ಪುಟ್ಟ ಗಾಯಾಗಳೊಂದಿಗೆ ಪಾರಾಗಿದ್ದಾರೆ.
