ನಂಜನಗೂಡು: ನಂಜನಗೂಡಿನಲ್ಲಿ ಸರಣಿ ಕಳ್ಳತನ ಬೆಳಕಿಗೆ ಬಂದಿದೆ. ಮುಸುಕು ಧರಿಸಿದ ಖದೀಮರು ಮಾರಕಾಸ್ತ್ರಗಳನ್ನ ಹಿಡಿದು ಓಡಾಡಿರುವ ದೃಶ್ಯಗಳು ಸಿಸಿ ಟಿವಿಯಲ್ಲಿ ಸೆರೆಯಾಗಿದೆ. ಒಂದೇ ರಾತ್ರಿ ಮೂರು ಮನೆಗೆ ಕನ್ನ ಹಾಕಿರುವ ಖದೀಮರು 2.25 ಲಕ್ಷ ನಗದು 2 ಲಕ್ಷಕ್ಕೂ ಅಧಿಕ ಮೌಲ್ಯದ ಚಿನ್ನಾಭರಣ ಕಳವು ಮಾಡಿದ್ದಾರೆ.
ಮೂರು ಮನೆಗಳ ಬಾಗಿಲು ಮೀಟಿ ಕೃತ್ಯ ವೆಸಗಿದ್ದಾರೆ. ಪಟ್ಟಣದ ಕೃಷ್ಣಪ್ಪ ಲೇಔಟ್ ನಲ್ಲಿ ಘಟನೆ ನಡೆದಿದೆ. ಸಂತೋಷ್ ಎಂಬುವರ ಮನೆಯಲ್ಲಿ 1.25 ಹಣ ಒಂದು ಕಾಲು ಕೆ.ಜಿ ಬೆಳ್ಳಿ ಮತ್ತು ಹನ್ನೊಂದು ಗ್ರಾಂ ಚಿನ್ನ ಕಳುವಾಗಿದೆ.
ಬಸವರಾಜು ಎಂಬುವರ ಮನೆಯಲ್ಲಿ ಒಂದು ಲಕ್ಷ ಹಣ , ಕಂಪ್ಯೂಟರ್ ಮತ್ತು ಇನ್ನಿತರ ಸಾಮಗ್ರಿಗಳನ್ನ ಕಳುವು ಮಾಡಿದ್ದಾರೆ. ಕಚೇರಿಯೊಂದಕ್ಕೆ ಪ್ರವೇಶಿಸಿರುವ ಖತರ್ನಾಕ್ ಕಳ್ಳರು ಪದಾರ್ಥಗಳನ್ನ ಚೆಲ್ಲಾಪಿಲ್ಲಿ ಎಸೆದಾಡಿದ್ದಾರೆ. ಸಿಸಿ ಟಿವಿ ಅಳವಡಿಸಿದ್ದರೂ ಲೆಕ್ಕಿಸದೆ ಮುಸುಕು ದಾರಿಗಳು ಮಾರಕಸ್ತ್ರಗಳನ್ನು ಹಿಡಿದು ಮನೆಯ ಬಾಗಿಲುಗಳನ್ನು ಮೀಟಿ ಕಳ್ಳತನ ನಡೆಸಿರುವುದು ಸಾರ್ವಜನಿಕರನ್ನ ಬೆಚ್ಚಿ ಬೀಳಿಸಿದೆ. ಸ್ಥಳಕ್ಕೆ ನಂಜನಗೂಡು ಪಟ್ಟಣ ಪೊಲೀಸ್ ಠಾಣೆಯ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿ, ಪ್ರಕರಣವನ್ನು ದಾಖಲು ಮಾಡಿಕೊಂಡು ತನಿಖೆ ಕೈಗೊಂಡಿದ್ದಾರೆ.
