ಹೊಸದಿಲ್ಲಿ: ಬಹುಕೋಟಿ ವಂಚನೆಯ ಆರೋಪಿ, ಬೆಂಗಳೂರು ಮೂಲದ ಸುಕೇಶ್ ಚಂದ್ರಶೇಖರ್ ಶುಕ್ರವಾರ ಬಾಲಿವುಡ್ ನಟಿ ಜಾಕ್ವೆಲಿನ್ ಫರ್ನಾಂಡೀಸ್ ಅವರ ಜನ್ಮದಿನದಂದು ಶುಭ ಹಾರೈಸಿದ್ದಾನೆ. ಅಲ್ಲದೆ ಮುಂದೆ ಒಟ್ಟಿಗೆ ಬರ್ತ್‌ಡ ಆಚರಿಸಲು ಕಾಯುತ್ತಿರುವುದಾಗಿ ಬರೆದುಕೊಂಡಿದ್ದಾನೆ.
ಪ್ರಸ್ತುತ ದೆಹಲಿಯ ಮಂಡೋಲಿ ಜೈಲಿನಲ್ಲಿರುವ ಚಂದ್ರಶೇಖರ್, ನಟಿಯನ್ನು ತಮ್ಮ “ಮಗು” (ಬೇಬಿ) ಎಂದು ಸಂಬೋಧಿಸಿದ್ದಾರೆ. ನಿನಗೆ ಜನ್ಮದಿನದ ಶುಭಾಶಯಗಳು. ದೇವರು ನಿನ್ನನ್ನು ಆಶೀರ್ವದಿಸಲಿ, ನಿನ್ನ ಜನ್ಮದಿನವು ನನಗೆ ಅತ್ಯಂತ ಸಂತೋಷದಾಯಕ ದಿನವಾಗಿದೆ. ನನ್ನ ಹುಟ್ಟುಹಬ್ಬಕ್ಕಿಂತಲೂ ನಿನ್ನ ಹುಟ್ಟುಹಬ್ಬ ನನಗೆ ಹೆಚ್ಚು ಅರ್ಥಪೂರ್ಣವಾಗಿದೆ. ನೀನು ದಿನದಿಂದ ದಿನಕ್ಕೆ ಹೆಚ್ಚು ಸುಂದರವಾಗುತ್ತೀದ್ದೀಯಾ, ಯೌವನ ಪಡೆಯುತ್ತಿದ್ದೀಯಾ ಎಂದು ಬರೆದಿರುವ ಪತ್ರವನ್ನು ಶುಕ್ರವಾರ ಬೆಳಗ್ಗೆ ಸುಕೇಶ್ ವಕೀಲ ಅನಂತ್ ಮಲಿಕ್ ಮೂಲಕ ಬಿಡುಗಡೆ ಮಾಡಲಾಗಿದೆ.
ನಿನಗೆ ಅತ್ಯಪೂರ್ವ ಹೂವುಗಳನ್ನು ಉಡುಗೊರೆಯಾಗಿ ನೀಡುವ ಮತ್ತು ಅಪ್ಪಿಕೊಳ್ಳುವ ಕ್ಷಣಗಳನ್ನು ಕಳೆದುಕೊಂಡಿದ್ದೇನೆ. ನಿನ್ನೊಂದಿಗೆ ಕೇಕ್ ಹಂಚಿಕೊಳ್ಳುವ ಕ್ಷಣ ಮಿಸ್‌ ಆಗಿದೆ ಎಂದಿದ್ದಾನೆ.
ಬೇಬಿ ನಿನಗೆ ಹುಟ್ಟುಹಬ್ಬದ ಉಡುಗೊರೆಯಾಗಿ ಚಿನ್ನ, ವಜ್ರಗಳು ಅಥವಾ ಮುತ್ತುಗಳಂತಹ ವಸ್ತುಗಳಿಗಿಂತಲೂ ಪ್ರಾಣಿಗಳಿಗೆ ಆಶ್ರಯ ತಾಣ ನಿರ್ಮಿಸುವ ವಿಚಾರವೇ ಹೆಚ್ಚು ಖುಷಿ ತರುತ್ತದೆ ಎಂಬುದು ನನಗೆ ಗೊತ್ತು ಎಂದು ಹೇಳಿದ್ದಾನೆ. ಅಲ್ಲದೆ ಮುಂದಿನ ವರ್ಷ ಖಂಡಿತವಾಗಿಯೂ ಒಟ್ಟಿಗೆ ಬರ್ತ್‌ಡೇ ಆಚರಿಸೋಣ…. ಜನ್ಮದಿನದ ಶುಭಾಷಗಳು ಹನಿಬೀ ಎಂದು ಹೇಳಿಕೊಂಡಿದ್ದಾನೆ.
